Во утринската програма „Здраво Македонијо“ на Канал 5, министерот за внатрешни работи Оливер Спасовски, одговарајќи на прашањето како Министерството се справува со криминалот кај нас, потенцираше дека тоа е основата на работењето на Министерството за внатрешни работи во однос на секој предизвик од безбедносната сфера.
„Во тој дел имаме поставено стратешки приоритети по кои што работиме и сакаме да ги реализираме. Ако погледнеме низ годините наназад, а статистиката е мерило за тоа што се работело, ќе видите дека во најголем процент од тоа што сме го поставиле како наша стратешка цел е реализирано, поради тоа што од година во година имаме сериозно намалување на криминалитетот и зголемување на ефикасноста на полицијата. Тоа е клучното мерило во успехот. За овие 8 месеци од 2023 година скоро 11% е намален криминалитетот од минатата година, за истиот период, и има зголемување за 4% на ефикасноста. Така што, минатата година беа најдобрите резултати од 1990 година до денеска, а тенденцијата во оваа година покажува дека ќе бидат уште подобри. Тоа е мотивацијата која што ја имаме. Секако дека секоја добронамерна критика, укажување итн., посебно од нашите стратешки партнери заради тоа што ние со нив работиме, ги градиме капацитетите – дали се тоа капацитети човечки или во однос на материјално-техничките ресурси – за нас се добредојдени. Тоа се приоритети кои што практично се заеднички со стратешките партнери, така што во секој поглед се работи и мислам дека многу повеќе треба да работиме не само на активно преземање мерки за сузбивање на одреден тип на криминал, отстранување на одреден безбедносен предизвик, туку и на јакнењето на јавната свест, на менувањето на перцепцијата, тоа клучната работа за нас“, истакна министерот Спасовски.
