Државната комисија за спречување на корупцијата (ДКСК) го усвои и јавно го објави извештајот за следење на системот на интегритет за 2025 година. Извештајот дава преглед на степенот на воспоставеност и примена на системот на интегритет во институциите од јавниот сектор, со посебен осврт на централната власт и единиците на локалната самоуправа.
Интегритетот значи одговорно, етичко и транспарентно постапување на институциите и носителите на јавни овластувања, во заштита на јавниот интерес и со намалување на ризиците од корупција и судир на интереси.
Системот на интегритет, пак, ги опфаќа внатрешните правила, процедури и механизми преку кои институциите го обезбедуваат таквото постапување во пракса.
Наодите од Извештајот укажуваат на позитивни поместувања во повеќе сегменти, вклучително зголемена вклученост на институциите, унапредување на интерните политики и поголема примена на алатки за проценка и управување со ризици од корупција. Истовремено, Извештајот укажува и на потребата од понатамошно унапредување, особено во делот на практичната примена на воспоставените механизми и јакнењето на административните капацитети. Во таа насока, ДКСК препорачува поголем фокус на практична примена на актите за судир на интереси, воспоставување евиденција на изземања, јасни правила за подароци и гостопримства, унапредување на контролите во јавните набавки, редовна проценка на ризиците од корупција и континуирани обуки за вработените и раководството.
Извештајот е објавен на веб-страницата на Државната комисија и доставен до релевантните институции, вклучително Собранието, Владата, Делегацијата на Европската Унија, Кабинетот на Претседателот на Републиката и институциите потписнички на политиката за интегритет.
Државната комисија за спречување на корупцијата останува посветена на јакнење на системот на интегритет како клучен превентивен механизам во борбата против корупцијата.
фото ДКСК
