Податочните центри не се збир на сервери и технологија. Тие создаваат цел економски синџир – за инженери, проектанти, градежни компании, енергетски и телекомуникациски оператори, системска интеграција, безбедност и одржување, информираше денеска министерот за Дигитална трансформација, Стефан Андоновски.
“Додека другите држави привлекуваат милијарди во оваа индустрија, и кај нас дебатата мора да се води со факти и конкретни проекти, а не со дезинформации, шпекулации и стравови без основа. Не смееме поради лажни информации однапред да се откажуваме од инвестиции што можат да донесат нов капитал, нова инфраструктура и нови можности за нашата економија.
Македонија работи во две насоки: национален податочен центар за сигурна државна инфраструктура и приватни инвестиции во податочни центри што ќе донесат капитал, знаење и нови можности за македонските компании.
Особено важно е што овие инвестиции можат да создадат силен домашен економски ефект. Нашата цел е што поголем дел од проектирањето, изградбата, опремувањето, интеграцијата и одржувањето да го преземат домашни компании, а со тоа да се создадат нови референци, ново знаење и можности македонските фирми подоцна да настапуваат и на странски пазари.
Податочните центри можат да станат дел од пошироката диверзификација на македонската економија кон индустрии со повисока додадена вредност – со повеќе знаење, повеќе технологија и повеќе можности за домашниот бизнис.”
фото МДТ
