Децата со церебрална парализа од Дневниот центар, до изградбата на новото основно училиште “Капиштец“ ќе бидат сместени во објектот на урбаната заедница „Славе Георгиевски – Шнајдерот“, кој е во сопственост на општина Центар.
Просторот е со површина од 250 м2, ќе биде целосно реконструиран, опремен и адаптиран за престој на овие лица. По изградбата на училиштето, тие добиваат на користење 300 м2 во новото училиште, со најсовремени услови и ќе имаат посебен влез во училиштето.
Новиот простор кој ќе го користат наредните две години е во согласност со стандардите за пристапност, движење и опслужување на лицата кои се движат со помагала и ќе има соодветно адаптирани тоалети.
Одлуката по предлог на градоначалникот Жерновски, била едногласно донесена од советниците во општина Центар на вчерашната седница.
