Премиерот Зоран Заев, заедно со премиерот на Црна Гора, Душко Маровиќ, ќе биде кодомаќин на Самитот на земјите членки на Јадранската повелба, што ќе се одржи утре во Подгорица, а на кој ќе учествува и потпретседателот на САД, Мајк Пенс.
Делегациите на земјите членки на Јадранската повелба ќе ги предводат премиерите на Албанија, Еди Рама, на Хрватска, Андреј Пленковиќ, на Црна Гора, Душко Марковиќ и на Босна и Херцеговина, Денис Звиздиќ. На самитот ќе присуствуваат и делегации на земјите набљудувачи, предводени од нивните премиери, односно Ана Брнабиќ од Србија, Хашим Тачи од Косово и Миро Церар од Словенија.
Во составот на делегацијата на Република Македонија ќе бидат вицепремиерката и министерка за одбрана, Радмила Шекеринска, вицепремиерот задолжен за спроведување на Рамковниот договор и политички систем, Хазби Лика, министерот за надворешни работи, Никола Димитров, и пратеникот Стево Пендаровски.
Заев на самитот ќе има и билатерални средби со шефовите на делегации и со потпретседателот на САД, Пенс, а потоа ќе учествува на работната сесија на самитот на кој теми ќе бидат „Интеграциски процеси во регионот“ и „Улогата и придонесот на Јадранската повелба кон регионалната и глобалната безбедност“.
