Министерот за правда Билен Саљији денеска изјави дека увидот на електронската распределба на предмети во судовите ќе стане пракса.
– Увидот во АКМИС системот отсега па натаму ќе биде перманентен согласно ингеренциите на министерот за правда во сите судови во државата – рече Саљији одговарајќи на новинарско прашање во Француската амбасада по презентацијата на Извештајот за соработката меѓу Академијата за судии и француската ЕНМ.
Работната група при Министерството за правда, како што рече, спроведе контрола во работењето на АКМИС системот во Основниот суд Скопје 1, а во текот на идната недела ќе се спроведе увид и во работењето на системот и во Апелацискиот суд Скопје. Првиот дел од увидот во АКМИС системот, како што додаде, ќе заврши со Врховниот суд.
– Кога ќе го имам сублимираниот извештај на Работната група од увидот во трите суда целосно ќе го објавиме пред јавноста – рече министерот за правда.
