Вести Изјави Македонија Ударни вести

Џафери: Честитки за Националниот ден на Власите

Сподели:

 

Претседателот на Собранието Талат Џафери, по повод 23 Mај – Националниот ден на Власите, упати честитка до припадниците на влашката заедница во РС Македонија.

“Дозволете од име на Собранието и од мое лично име да Ви го честитам 23 Мај, Националниот ден на Власите. Упатувам искрени желби за убав празничен ден, поминат во мирот и спокојот што го нуди семејниот дом исполнет со блиски и драги луѓе. Сега повеќе од кога било треба да се сплотиме, да се слушнеме и видиме, да бидеме рамо за поддршка и охрабрување за нашите блиски, за нашите деца и за нашата држава.

Предизвиците со кои се соочува светот чиј дел сме неспорно и ние, колку и да сме мали, имаат свој негативен одраз врз секојдневието и навиките што сме ги имале. Било да се работи за економската, енергетската, прехранбената криза, било да се работи за најсуштинското – животот како благослов, нашата животна средина и планетата Земја која се менува од ден на ден. Не можеме да ја занемариме ниту политичката нестабилност во нашата земја, која се одразува врз предвидениот и очекуван напредок кон исполнувањето на стратешките цели на РС Македонија. Сето тоа е мотив да бидеме единствени, да споделуваме и добро и лошо, да се радуваме и тагуваме и за успесите и за поразите, затоа што и тие се заеднички.

Република Северна Македонија, е наш заеднички, топол и безбеден дом и земјата во која најдобро ги изразуваме нашите посебности, а сепак обединети во една единствена целина, во која секоја заедница е вреден дел кој на несебичен начин придонесува со тоа што најдобро може за заедничката цел – напредна и успешна Република Северна Македонија!

Честитки и Ви посакувам убав празничен ден!”

Сподели: