Американскиот претседател Џо Бајден денеска дојде во ненајавена посета на Кијив во знак на поддршка за годишнината од руската инвазија, ветувајќи му на украинскиот претседател Володимир Зеленски дека Вашингтон ќе ја поддржува Украина сè додека тоа е потребно, пренесе Ројтерс.
Сирените за воздушен напад се слушаа низ главниот град на Украина додека Бајден го посети Кијив, иако нема извештаи за руски ракетни или воздушни напади.
„Вашата посета е исклучително важен знак за поддршка за сите Украинци“, рече Зеленски, додавајќи дека тој и Бајден разговарале за оружјето со долг дострел за време на посетата.
Белата куќа соопшти дека Бајден ќе објави повеќе санкции за Русија и воена поддршка за Украина, вклучувајќи артилериска муниција, противоклопни системи и радари за воздушно набљудување.
Посетата на Бајден дојде еден ден пред рускиот претседател Владимир Путин да се обрати пред јавноста и да ги утврди целите на Русија за втората година од инвазијата што ја започна на 24 февруари минатата година.
Русија досега обезбеди само мали придобивки во нападите од замрзнатите ровови на источниот фронт во последните недели./Мета.мк
