Демократската унија за интеграција (ДУИ) ја изразува својата длабока загриженост поради последната одлука на Владата за активирање на статусот на Јени Џамија во Битола како галерија, занемарувајќи ги верските и историските чувства на една важна заедница во државата.
Овој чин, кој продолжува со логиката на еднострани одлуки, е јасен показател за континуираната институционална, етничка и верска деградација што ја карактеризира оваа Влада.
Категорично го осудуваме овој неодговорен пристап, кој ги продлабочува меѓуверските и меѓуетничките поделби во нашето општество.
Во една земја како Северна Македонија, каде мултиетничкиот и мултирелигискиот соживот се едни од темелните вредности на државата, ваквата одлука претставува сериозен удар врз толеранцијата, почитувањето и соживотот што со години внимателно ги градевме.
Оваа одлука на Владата претставува чин на деградација што создава поделби и поттикнува нови социјални тензии, дополнително влошувајќи ја атмосферата на недоверба меѓу заедниците.
Во овој контекст, ДУИ ги осудува политиките на Владата што имаат за цел рушење на темелите на еднаквоста и соживотот, претворајќи ги овие теми во политички алатки за поделби.
Наместо да промовира дијалог и разбирање, актуелната Влада продолжува со агенда што ја загрозува стабилноста и хармонијата на нашата држава.
ДУИ силно бара почитување на културното и верското наследство на секоја заедница во Северна Македонија.
Светите објекти и историските споменици треба да се третираат со чувствителност и почит кон нивната улога во идентитетот и историјата на заедниците на кои припаѓаат.
Бараме итно прекинување на политиките на поделби.
Одлуките што ги занемаруваат верските и етничките чувства се неприфатливи и немаат место во една демократска и мултиетничка држава.
Владата мора одговорно да постапува за да обезбеди нејзините одлуки да ги рефлектираат потребите и чувствата на сите заедници на правичен и еднаков начин.
Јасно ставаме до знаење дека оваа одлука не е изолиран случај, туку дел од серија активности што ги поткопуваат темелите на мултиетничкиот и мултирелигискиот соживот во Северна Македонија.
Овие политики на деградација не ја претставуваат волјата на граѓаните и не придонесуваат за европската иднина на државата.
ДУИ ги повикува сите вклучени институции да постапуваат одговорно и да ја преиспитаат оваа одлука за да ја зачуваат и промовираат хармонијата меѓу заедниците.
Мултиетничкиот и мултирелигискиот соживот е неприкосновена вредност што не смее и не треба да биде загрозена од вакви еднострани и непромислени одлуки.
Стабилноста и иднината на Северна Македонија може да се осигураат само преку заемна почит, еднаквост и промоција на соживотот.
ДУИ, соопштение
