Демократската унија за интеграција го поздравува денешното заседание на Поткомитетот за Европа при американскиот Конгрес, посветено на политиката на Соединетите Американски Држави и безбедносните предизвици на Западен Балкан.
Континуираниот американски интерес за случувањата во регионот има особено значење и за Северна Македонија.
Соединетите Американски Држави беа меѓу клучните партнери во постигнувањето на Охридскиот мировен договор, неговото спроведување и консолидирањето на мултиетничкиот карактер на државата. Подеднакво значаен беше и американскиот ангажман за евроатлантската ориентација и европската перспектива на земјата.
Токму во период кога столбовите на Охридскиот договор – правичната застапеност, јазичната еднаквост и механизмите на заедничко одлучување – се соочуваат со сериозни предизвици, вниманието на Вашингтон кон стабилноста и евроатлантската иднина на Западен Балкан добива особена тежина.
За ДУИ, пораката останува јасна: долгорочната стабилност на Северна Македонија се темели на целосното почитување на Охридскиот договор и на неповратното продолжување на патот кон Европската Унија.
Стратешкото партнерство со Соединетите Американски Држави беше од пресудно значење во клучните моменти за земјата и останува важна гаранција за зачувување на архитектурата на мирот, еднаквоста и евроатлантската ориентација, велат од ДУИ.
