Денеска во Тиват, Црна Гора се одржува Самитот Европска Унија-Западен Балкан, каде главен фокус ќе биде проширувањето на Унијата.
Премиерот Христијан Мицкоски ќе присуствува на Самитот Европска Унија- Западен Балкан, кој се одржува под слоганот „Заеднички просперитет и стабилност на Европската Унија и Западен Балкан“.
Самитот ќе се одржи во хотелот „Regent Porto Montenegro”, каде што лидерите ќе разговараат за актуелни прашања поврзани со европската интеграција на земјите од регионот и соработката со Европската Унија.
Покрај лидерите на шесте земји од регионот, присутни ќе бидат и претседателката на Европската комисија Урсула фон дер Лајен, високата претставничка на ЕУ за надворешна и безбедносна политика Каја Калас и претседателката на Европскиот парламент Роберта Метсола.
Со состанокот ќе претседава шефот на Европскиот совет Антонио Кошта.
