Вести Македонија Ударни вести

Украинците во земјава на протест, потсетија на злосторствата извршени врз нивната татковина

Сподели:

 

Здружението на Украинците во земјава „Лесја Украинка“ денеска организираше мирен протест во Скопје против руската воена агресија врз Украина. Протестот започна во 12 часот на детското игралиште зад Универзална сала, а заврши пред амбасадата на Руската федерација во Скопје.

Преку транспаренти и илустрации, присутните ја искажаа загриженоста за случувањата во нивната татковина и побараа Русија да престане со агресијата и „да ги тргне рацете од Украина“.

Во игралиштето позади Универзална сала, кое инаку е донација од Руската амбасада во Скопје, врз таблите со имиња на руски градови беа прикачени слики од уништените градови во Украина откако Русија ја започна својата агресија. Поставени беа и фотографии заедно со испишаните имиња на малолетници кои загинале од раката на руските агресори.

фото: Мета.мк

 

Пред Руската амбасада во Скопје, пак, беа изложени написите „Терорусија“, „Го поддржуваш Путин = убиваш деца“, „Украина под напад“.

Присутните поддржувачи на Украина потсетија на застрашувачките бројки на загинати украински цивили, но и на загубите што ги претрпеа руските агресори.

Од Здружението „Лејса Украинка“ посочија дека протестот се организира за да потсетат на злосторствата извршени врз Украина и на одземените невини животи, вклучително и на децата.

Сподели: