Вести Македонија

Градоначалници од ВМРО-ДПМНЕ во одбрана на Владимир Талески

Сподели:

maxresdefault

Градоначалниците на Охрид, Прилеп, Босилево, Кривогаштани, Ресен и Новаци денеска застанаа во одбрана на битолскиот градоначалник Владимир Талески, кој е осомничен во случајот „Транспортер“ за малверзации со превозот на ученици во Битола.

Градоначалникот на Охрид, Никола Бакрачески тврди дека Талески е чесен и искрен градоначалник и пред се многу добар човек, кој не би ги прекршил законите на Република Македонија.

– Верувам дека низ една регуларна судска постапка или правна процедура тој ќе го докаже тоа – рече Бакрачески, додавајќи дека има верба во правосудниот систем на РМ и во судските органи.

Градоначалникот на Прилеп, Марјан Ристески е убеден и уверен во чесноста на постапките на Талески, додавајќи дека тој важи за еден од најуспешните градоначалници во Македонија.

– Господинот Талевски пожртвувано три мандати се бори за развојот на Битола, на Пелагонискиот регион, за промоција на Битола и Македонија. Ова значи комплетно дискредитирање, обид за дискредитирање на господинот Талевски и локалната самоуправа во заложбите за попросперитетен развој на Битола и Република Македонија, рече Ристески.

Според градоначалникот на Босилево, Љупчо Колев, Закон за јавни набавки е донесен под сугестии и директиви на Европската унија, градоначалникот нема големо влијание врз набавките на стоки и услуги во општините, а за она што се товари Талески времето ќе покаже дека било во согласност со сите законски прописи.

Градоначалник на општина Кривогаштани, Тони Затковски исто така рече дека е убеден во чесноста на битолскиот градоначалник и додаде сите политички хајки кои што се одвиваат во овој период во Македонија се деструктивни.

-Со таквиот начин на дејствување, доаѓа секој во Македонија да претставува некој експерт, носи правда на своја рака и сметам дека треба да ги оставиме сите судски институции да си ја реализираат својата работа, а не да подлегнуваат под тие притисоци, рече Затковски.

Градоначалниците на општините Ресен и Новаци, Ѓоко Стрезовски и Лазар Котевски денеска на прес-конференција оценија дека судство потклекна под притисоците на СДСМ и на Зоран Заев.

– Македонскиот народ ова не го одобрува. Владимир Талески е чесен и искрен градоначалник. Тој беше и претседател на Советот на пелагонискиот регион и успешно ги спроведуваше програмите за развој на регионот. Не го оправдуваме ова насилие на СДСМ и Зоран Заев. Талевски не заслужува третман каков што го има во моментот – рече градоначалникот Котевски.

http://meta.mk/gradonachalnitsi-od-vmro-dpmne-vo-odbrana-na-vladimir-taleski/

Сподели: