Премиерот Димитар Ковачевски заедно со премиерката на Република Србија, Ана Брнабиќ денеска, на наплатната рампа Прешево го промовираа заедничкиот интегриран електронски систем за наплата на патарините.
Станува збор за брзо и ефикасно плаќање на патарините во Северна Македонија и Србија со помош на посебен ТАГ уред за бесконтактно електронско плаќање на патарина, кој успешно функционира и овозможува непречено движење преку териториите меѓу двете земји.
„Со премиерката на Србија, Ана Брнабиќ, денеска го промовиравме заедничкиот електронски систем за наплата на патарините. Овој систем овозможува брзo и ефикаснo движење на граѓаните со помош на посебен ТАГ уред, кој по регистрацијата функционира и во двете земји непречено. Овa е најдобар пример дека Отворен Балкан функционира и дава резултати и конкретни придобивки, како што е заедничкиот електронски систем за наплата кој ќе придонесе кон поквалитетни и подобри услови за живот за нашите граѓани.
Бројот на туристи кои во текот на изминатите 2 години доаѓаа во нашата држава е за 500% поголем од пред воспоставувањето на иницијативата Отворен Балкан. Она што следува е воспоставување на софтверското решение за непречена размена на работници, да може секој да дојде да се регистрира преку единствен софтвер и во Србија и во Северна Македонија и во Албанија без административни процедури кои денес траат по 3 месеци.
Ние ќе работиме уште повеќе на зголемувањето на размената. Македонците сакаат српски производи, Србите сакаат македонски производи и за таа цел мешовитата трговска комисија ќе работи на што поголемо зближување и на компаниите, отворање на 2-та пазари и тргање на сите бесцарински бариери кои во моментов ги има, а кои во текот на минатата година ги намаливме.”
