Изминаа 24 часа откако беа демантирани грубите лаги од страна на ВМРО – ДПМНЕ, пласирани за време на празници, а партијата сѐ уште не испрати извинување. Како поука за понатаму, за партија која е фатена на дело како лаже, оставаме уште 24 часа да се извини и кон Министерството и пред сѐ кон јавноста која беше вознемирена за време на празници, реагираат од МНР.
Со тоа, станува очигледно дека обвинувањата на ВМРО-ДПМНЕ преставуваат свесен обид за внесување меѓуетнички тензии и раздор во општеството, што може да се потврди и од вордингот и тајмингот на самата манипулација пласирана од ВМРО-ДПМНЕ.
Фактот што обидот за манипулација на јавноста беше направен за време на празници, претставува дополнителна навреда кон граѓаните на земјава, за што и очекуваме извинување.
Како одамна воспоставена пракса Министерот се обраќа на ист начин од почетокот на мандатот како министер за надворешни работи последните три години, како и претходно две години како Вицепремиер за европски прашања; на јавните настапи пред домашната јавност Министерот се обраќа на двата службени јазици, што е видливо и од самиот видео запис (подолу), при што за медиумите секогаш е обезбеден и соодветен превод, согласно Уставот и Законот за примена на јазиците, соопштија од МНР.
Во прилог линк од обраќањето пред новинарите по средбата со министерот Албарез Буено: https://www.facebook.com/watch/?v=750209426738833&mibextid=Nif5oz
Реакцијата на МНР е по обвинувањата на ВМРО-ДПМНЕ дека шефот на дипломатијата Бујар Османи го прекршил Законот за употреба на јазиците за време на прес-конференцијата со шпанскиот колега Хосе Мануел Албарез Буено во петокот.
ВМРО-ДПМНЕ побара оставка и кривична одговорност од шефот на македонската дипломатија, Бујар Османи, бидејќи на официјалната прес-конференција со неговиот шпански колега зборувал само на албански јазик.
