На 26 април (петок), со почеток во 20 часот, во НУ Центар за култура Крива Паланка ќе биде промовирана книгата „Кривопаланечки староградски песни“, која сведочи за негувањето и зачувувањето на градската музичка традиција.
Автор на првото издание на збирката староградски кривопаланечки песни е младиот Филип Додевски, член на КУЗ „Распеани Паланчани.
Во делото се запишани вкупно 17 песни со текст и нотен запис во кои се опеани личности и настани од кривопаланечката историја, минато и од градскиот живот.
Одала се је Ленка Стевчова, Минеш, минеш, Шавр трава, бучемиш, како и Блазе тебе малој моме за кој е направен видео запис со Александар и Дац, се само дел од запишаните староградските песни познати меѓу кривопаланчани, а кои се пеат со децении.
Издавач на книгата е Општина Крива Паланка, а освртот за градската традиција и естетска анализа на песните е на д-р Јордан Михајловски, писател, публицист, хроничар и член на КУЗ „Распеани Паланчани“.
Во чест на промоцијата на првата книга за кривопаланечката староградска песна ќе настапат КУЗ „Распеани Паланчани“ и КУД „8-ми Отомври“ при НУ Центар за култура.
Овој настан е дел од манифестацијата „Крива Паланка –Град на културата 2024“.
