Академик Влада Урошевиќ ја доби книжевната награда „Роман на годината“ за 2022 година, за романот „Вистинита но не многу веројатна историја за семејството Пустополски за куќата покрај Вардар и за четирите прстени“.
Романот е во издание на „Арс Либрис“, дел од „Арс Ламина – публикации“, која го промовираше новиот, седми роман на писателот Влада Урошевиќ.
Книжевната награда „Роман на годината“ ја доделува Фондацијата за унапредување и промоција на културните вредности „Славко Јаневски“.
За изборот на книжевната награда одлучуваше жири-комисијата во состав: Симона Јованоска, Гоце Ристовски, Илир Ајдини, Сашо Кокаланов и Катерина Богоева.
Во најтесниот избор за книжевната награда за 2022 година влегоа и авторите Венко Андоновски за делото „Папокот на светлината“, Живко Грозданоски за „Писмо за Глорија“ и „Столб што пее“ од Томислав Османли.
