Раководството на Чешката државна телевизија (ЧТ) официјално ги повика шефот на државата Милош Земан и регионалниот гувернер Мирослав Новак да им се извинат за обвинувањата дека сакале да ја провоцираат чешката прва дама во јавноста.
Се работи за наводно подготвувана провокација од тимот на ЧТ кон Ивана Земанова, која требаше да присуствува на театарска престава во Острава, каде на зградата било обесено тибетско знаме, со цел да се покаже незадоволство од политиката на Земан.
Земан и Новак ги обвинија репортерите на ЧТ дека биле подготвени со микрофони да ја следат реакцијата на Земанова, која на крајот го откажа присуството.
– Се работи за невидена дрскост од ЧТ. Однесувањето на телевизијата веќе ги надмина сите можни граници, коментираше за барањето за извинување портпаролот на претседателот, Јиржи Овчачек. Моравско-шлезискиот гувернер рече дека ќе почека на полицискиот извештај во врска со случајот.
