Во знак на почит и благодарност кон ликот и делото на трагично починатиот музички уметник, врвен тромбонист, пијанист, композитор, аранжер, продуцент и професор, Филип Стевановски, во Занаетчиски дом, се одржува двовечерна хуманитарна манифестација “Музика за Филип – поддршка за Кочани!” (14-15.10.2025 г.), во организација на Фондацијата за култура и спорт Куманово, со поддршка на Градоначалникот и Советот на Општината и Министерството за култура и спорт на РСМ, во областа на музиката и музичко – сценска дејност.
Пред публиката се обрати градоначалникот на Општина Куманово, Максим Димитриевски, со емотивни зборови, посветени на големиот уметник, кој зад себе остави богата музичка ризница, во присуство на претседателката на Советот на Општината, Ивана Ѓорѓиевска и претставници од општинската администрација.
На првата фестивалска вечер беше промовирано делото “Монографија за еден живот исполнет со звук, љубов и уметност”, напишанo од неговиот татко, Маријан Стевановски, прикажан документарен филм и беа интерпретирани композиции, авторска музика на Филип, во изведба на неговите колеги и соработници музичари. Втората интернационална вечер е резервирана за настап на српскиот џез состав FISH IN OIL и македонските џез групи 3D PROJECT и Oliver Duev Trio.
Хуманитарниот настан е посветен на загинатите лица, во пожарот на дискотеката “Пулс”, во Кочани.
