Државниот завод за ревизија започна со подготовка на Годишната програма за работа за 2027 година, со која се утврдуваат ревизорските активности што ќе се спроведуваат во текот на следната календарска година.
Програмата ја донесува Главниот државен ревизор и најдоцна до крајот на месец декември, заради информирање се доставува до Собранието на Република Северна Македонија и се објавува на веб-страницата на ДЗР.
Во насока на унапредување на транспарентноста и вклучување на јавноста во процесот на утврдување на ревизорските приоритети, ДЗР ги повикува сите засегнати страни – институции, организации, граѓански здруженија и други заинтересирани субјекти да достават предлози за институции, субјекти и области за кои сметаат дека постои потреба и јавен интерес за спроведување државна ревизија.
Доставените предлози ќе бидат разгледани во процесот на утврдување на ревизорските приоритети, при што изборот на ревизиите ќе се врши врз основа на методолошките акти на ДЗР, Стратешкиот план за ревизија за периодот 2024–2027 година, професионалните стандарди на ИНТОСАИ, методологијата за оценување на ОЕЦД/СИГМА, Целите за одржлив развој на Обединетите нации, Националната развојна стратегија 2024–2044 година, процената на ризиците и расположливите човечки, финансиски и технички ресурси.
Краен рок за доставување на предлозите: 1 декември 2026 година.
Формулар за доставување предлози е достапен на следниот линк.
