Пронајден планинарот кој исчезна во Мариово

Сподели:

По повеќечасовна потрага, денеска (16.11.2026 година), во 10:15 часот, во село Кален, во Мариовскиот регион, беше пронајден 62-годишниот планинар кој исчезна при планинарење во близина на село Лениште, општина Прилеп, информираат од ЦУК.

Во акцијата беа вклучени полициски службеници, екипа на ТППЕ Прилеп, РЦУК Прилеп и Дирекцијата за заштита и спасување – Прилеп, со координација на Центарот за управување со кризи.

Настанот се случи вчера во попладневните часови, кога лицето, по пад и губење на свеста, во 16:47 часот се јави на телефонскиот број за итни случаи 112, со цел да ја утврди точната локација на која се наоѓа. Притоа посочи дека се наоѓа помеѓу село Лениште и манастирот над селото.

Веднаш по пријавата беа известени надлежните полициски служби, по што полициска екипа излезе на терен и започна потрага. Во дополнителен телефонски разговор, остварен во 17:10 часот, лицето информираше дека се движи кон село Лениште, но дека батеријата на мобилниот телефон му е при крај.

И покрај преземените активности, до 18:30 часот лицето сè уште не беше пронајдено, а неговиот мобилен телефон беше исклучен. Потрагата беше интензивирана, со вклучување на дополнителни полициски службеници и екипа на ТППЕ Прилеп. Беше извршена и проверка на неговата домашна адреса, при што беше утврдено дека не се вратило дома.

Во текот на целата акција, Центарот за управување со кризи (ЦУК), континуирано ја координираше потрагата и комуникацијата меѓу надлежните институции и службите вклучени во теренските активности, со цел навремено преземање на потребните мерки и ефикасно спроведување на акцијата.

По повеќечасовната потрага, утрово лицето беше пронајдено во село Кален, во Мариовскиот регион. Веднаш по пронаоѓањето, екипа на граничната полиција се упати на терен со цел безбедно да го преземе и донесе.

Сподели: