Во учебниците по историја, ќе се менуваат термините каде што бугарската нација се поврзува со фашистички окупатор, изјави денеска премиерот Зоран Заев.
-Никаде во Европа не се спомнува името на нацијата. Се спомнува фашистичкиот окупатор и во тој дух, во духот на пријателството, соработка и добрососедство, нормално, очекуваме тоа да се направи. Имаме препознаено одредени слабости и во бугарските учебници, спремни се исто така и од бугарската страна тоа да го направат, зашто така се гради пријателство, наместо да оквалификувате цела една нација за одредена определба во тоа време, изјави денеска премиерот Зоран Заев, одговарајќи на новинарско прашање.
Исто така кажа и дека голем дел од спомениците што ги има и во Бугарија и во Македонија треба да бидат во пријателски дух, така што, посочи, фашизмот не смее да има етничка димензија.
„Не смее фашизмот да има етнички димензии. Кај одредени некои наши споменици веќе тоа е направено. Каде што стоело бугарски фашистички окупатор, сега веќе е фашистички окупатор, бидејќи не можете нација да обвините за учество во третиот пакт во тоа време. Музеите ни се во ред, туку одредени споменични целини и одредени учебници и во Северна Македонија и во Бугарија, ќе треба да духот на пријателството да ги учиме следните генерации“, изјави Заев.
