Алтернатива Настани

Балкански поетски камп за млади “Ванчо Николески”

Сподели:

 

Со поздравни обраќања од страна на градоначалникот на Охрид, Кирил Пецаков, како и претседателот на Друштвото на писателите на Македонија, професор д-р Христо Петрески, во Охрид, започна четвртото издание на Балканскиот поетски камп на деца и млади “Ванчо Николески”.

 

 

Учествуваат млади автори од Украина, Бугарија, Албанија, Хрватска, како и Македонија – овој пат, со претставник од помалите етнички заедници, преку Детската амбасада “Меѓаши” од Скопје.

Пецаков, го нагласи несомнениот придонес на Ванчо Николески како родоначалник на детската литература во Македонија, ја повтори поддршката на општина Охрид и посака натамошна афирмација на манифестацијата.

-Сакам да ве уверам дека секогаш сте биле и ќе бидете драги гости на оваа куќа, која широко ви ги отвора вратите, не само на чинот на свеченото отворање на манифестацијата, туку и воопшто. Добредојдени сте кај мене и кај моите соработници.

Христо Петрески, нагласи дека Друштвото на писателите на Македонија, после долгогодишниот заборав, се вклучува во афирмацијата на делото на Николески.

-Лично присуствувавме и дадовме придонес, после децениско заборавање, во поставувањето на некои обележја во родното село Црвена Вода, на неговата родна куќа, како и Спомен собата. Друштвото Мацково, како организатор на манифестацијата, ја има целата наша поддршка да продолжи, да ја шири дифузијата на меѓународен план-рече Петрески.

Во име на покровителот на манифестацијата – Светската акдемија на поезијата при УНЕСКО, од Равена, поздравно писмо упати генералниот секретар д-р Лаура Троиси:

Балканскиот поетски камп за деца и млади „Ванчо Николески“ (26-28 август), ги обединува младите поети и писатели за деца, од различни земји на Балканот, особено оваа година од Украина, Бугарија, Албанија, Хрватска и Македонија. На сите учесници на Кампот им посакуваме пријатен престој во Охрид и неговото опкружување, добрата меѓусебна соработка, како и спроведувањето на програмскит цели. Оваа пријателска и креативна средба треба да послужи како пример за сите луѓе со добра волја, писатели и други балкански уметници, кои преку размена на своите идеи и креативни резултати, го потврдуваат сопствениот јазик и литература, овозможуваат и нумерички помалите нации, да бидат попознати и почитувани – напиша Троиси.

Со традиционално, специјално Послание, се обрати и претседателот на Северна Република Македонија, Стево Пендаровски:

Како учесници на овој камп кој добива меѓународни димензии, имате одлична можност да соработувате и дискутирате, заеднички да работите на книжевни теми, а со тоа да ги збогатувате знаењата и унапредувате вашите творечки вештини, пишува Пендаровски, нагласувајќи го посебно учеството на авторите од Украина, Ана Баграна и Оксана.

-Нивното учество, како и учеството на други автори со украинско потекло уште еднаш ја покажуваат нашата солидарност со народот на Украина, во овие најтешки мигови од нивната понова, а и историјата на Европа, потенцира Пендаровски. 

За ваквите книжевни средби, Пендаровски пишува дека се своевиден поетски фестивал и можност за истражување и надградба на младите автори, придонесуваат за поголема соработка и комуникација меѓу различните култури, меѓусебно запознавање и зближување на младите генерации, кое ни е потребно во денешницата во која отуѓувањето сѐ почесто е тема.

Поздравни пораки уште упатија поетот, член на Светската академија на поезијата и Координатор за словенскиот свет, Мајо Даниловиќ, како и професор д-р Милутин Ѓуричковиќ, претседател на Управниот одбор на Управниот одбор на Институтот за детска књижевност, од Белград.

Најмладата учесничка, Оксана Чернаева, ја прочита песната “Галеб”, што од присутните беше примено со воодушување и аплауз.

Работата на Кампот продолжи со Поетската работилница, раководена од д-р Ана Христовска и Ана Баргана.

Христовска која има докторирано книжевност на тема: „Расказот и раскажувањето како услов за правилен говор”, што е нејзина потесна специјалност, а има и големо искуство како логопед. Таа одржa предавање на тема: „Правилниот говор кај децата и креативно изразување на учениците”.

Ана Бергана (АннаБагряна), украинска писателка, поет, драматург и преведувач, поранечшен секретар на Националниот сојуз на писателите на Украина за работа со млади автори и главен уредник на списанието „Гранословие“. Преведува од словенски јазици. Составител и преведувач на „Антологија на современна поезија на Македонија“ на украински јазик.

Денеска учесницитена Кампот, традиционално, имаат прием од страна на менаџментот на светскиот поетски фестивал – “Струшките вечери на поезијата”, а ќе одат во посета и на населбата Вевчани, со разглед на Вевчанските извори, Куќата на Михајло Пупин и други атрактивности.

Веле Митаноски

Сподели: