Кинотеката на Македонија вечерва, на 19 јуни, со почеток во 20:30 часот, ќе ја одбележи 30-годишнината од премиерата на македонскиот филм „Самоуништување“ со специјална проекција.
Филмот е во режија на Ербил Алтанај, додека сценариото е дело на Сашко Насев. Низ приказната за еден таксист и неговите секојдневни средби со различни ликови, филмот отвора простор за хумористичен и сатиричен осврт кон општествените состојби и човечките карактери.
Главните улоги ги толкуваат Јовица Михајловски, Катерина Коцевска и Оливер Митковски, а актерската екипа ја надополнуваат бројни познати имиња од македонската филмска сцена.
Три децении по својата премиера, „Самоуништување“ останува препознатливо остварување во македонската кинематографија, кое и денес привлекува внимание со својот специфичен хумор и критички поглед кон општеството.
