Европската унија ќе ги трпи последиците од нејзиниот недостаток на единство во однос на Западен Балкан, вели Алекс Ципрас, поранешен грчки премиер и лидер на левичарската партија Сириза, пишува „Еурактив“.
Ципрас го коментираше повеќекратниот неуспех на ЕУ да им одобри на Албанија и Македонија отворање формални преговори, како и континуираниот никаков напредок во однос на визната либерализација на Косово.
„Значи, мислам дека ова е уште еден пример за неспособноста на Европската унија како целина да носи колективни одлуки со стратешки фокус. И мислам дека ЕУ веќе плати и ќе плаќа за тоа во иднина“, рече тој.
Македонија стана кандидат за ЕУ пред 17 години, а соседна Албанија пред осум години. Иако Европската комисијата јасно кажа дека двете земји ги исполнуваат критериумите за пристапување, тие остануваат во чекалната на ЕУ. Ова првично се должи на недостаток на консензус меѓу земјите-членки, но сега е заменето со вето од Бугарија за Македонија поради културни и историски прашања.
Софија сега ќе го укине ветото доколку се исполнат одредени услови, но и Скопје вели дека мора да се земат предвид неговите услови.
„Одлуката на самитот на ЕУ ја потврдува несигурноста на Европа кон оние земји кои презедоа многу важни чекори, а перспективата за датум за пристапни преговори постојано се одложува“, рече Ципрас, додавајќи дека „Европа треба подобро да не дава ветувања ако не може да ги исполни“.
„Се прашувам какво ќе биде мислењето денес во Украина откако таа го доби овој брз кандидатски статус за ЕУ. И што може да значи тоа […] кога ќе видат дека овој режим не значи ништо. Дека Украина може да остане во фазата на кандидатски статус многу, многу години“, рече тој, повторувајќи ги коментарите на албанскиот премиер Еди Рама, кој рече дека Украина не треба да се надева во скоро време.
Во врска со специфичната положба на Македонија, Ципрас рече дека Договорот од Преспа со кој земјата го смени името „не бил залуден“. Скопје изрази загриженост дека веќе го сменило името и ако попушти на барањата на Софија во однос на јазикот и историјата, може да биде принудено да направи уште повеќе отстапки во иднина.
„Тоа е договор што го врати Западен Балкан на патот на стабилност, а нашиот регион во перспектива на мир и соработка далеку од влијанијата на третите сили во регионот, како Турција и Русија, кои имаа големо влијание во регионот“, заклучи Ципрас во разговорот за „Еурактив“./МИА
