На сцената на Националната опера и балет вчера се одржа музичко-сценскиот спектакл „Фолклорно-класична симбиоза“ на НУ Национална опера и балет и НУ „Танец“.
Над 130 учесници на сцената, со заедничка изведба на симфонизираните антологиски кореографии: „Осоговка“, „Малешевка“, „Жетварка“, „Пиринско пролетно цвеќе“, „Водарки“, како и многу други македонски ора и вокални мелодии од богатиот репертоар на „Танец“.
Концертот се одржи под диригентската палка на маестра Бисера Чадловска, концерт-мајстор е Верица Ламбевска, а хор-мајстор Ѓурѓица Дашиќ. Настапија оркестарот, хорот и играорниот хор на НУ „Танец“ заедно со оркестарот и хорот на НУ Национална опера и балет.
„Фолклорно-класична симбиоза“ е замислен како музичка фузија на две различни традиции – класиката и фолклорот, вешто преточена во новите аранжмански партитури на Дарко Илиевски – истакнат инструменталист, автор и раководител на оркестарот на „Танец“.
