Специјалното јавно обвинителство денска треба да почне со трансферот на предметите во Јавното обвинителство.
„Ја известуваме јавноста дека од страна на Јавното обвинителство доставен е допис во кој е наведено дека согласно член 6, став 5 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, неопходно е ова Обвинителството да преземе дејствија за предавање на предметите во Јавното обвинителство. Постапувајќи по дописот, до Јавното обвинителство доставено е известување дека Јавното обвинителство за гонење на кривични дела поврзани и кои произлегуваат од содржината на незаконското следење на комуникациите е подготвено веднаш да ги предаде предметите по кои постапува со сите списи и докази. За останатите детали околу примопредавањето ќе известиме дополнително“, објавија од СЈО на нивната веб-страница.
И републичкиот јавен обвинител, Љубомир Јовески, вчера изјави дека предавањето треба да почне денеска.
– „Утврден е начинот на преземање на предметите и со тоа ќе се отпочне од утре“ – изјави за ТВ 24 Љубомир Јовески.
Според информациите, обвинителите од СЈО треба да го предадат својот предмет, но пред тоа да се потпише и архивира. Истата процедура ќе важи и за истрагите и предистрагите.
