Во последната година и пол, целиот свет беше во вонредна состојба, Во таква ситуација соочени со постојани загрижувачки и несреќни вести, многумина се определија да кажуваат и прават шеги, пишуваат афоризми, објавуваат хумористично-сатирични колумни, креираат комични стенд-ап шоуа.
Можеби искуството од минатото може да ни помогне, што покажува дека и покрај најголемите трагедии што ги погодија одредени земји, делови од светот, па дури и целиот свет, човечкиот дух никогаш не згасна и дека разни хумористични форми секогаш се изведуваа. Всушност, тоа беше начин на човечка одбрана од смртта, злото, стравот и неизвесноста.
Само здрава личност се смее. Познатата поговорка дека „смеењето е лек“ не се кажува без причина, што е исто така научно докажано. Смеата, тврдат лекарите, го подмладува срцето и мозокот, ја намалува болката, го лечи стресот, ги зајакнува крвните садови, ја зголемува одбраната на телото, ја подобрува циркулацијата … Важноста на смеата е огромна на ментално ниво, бидејќи го чисти телото од злоба, завист и егоизам. Големиот румунско-француски драмски писател Ежен Јонеско напиша дека „само комичното може да ни даде сила да ја издржиме трагедијата на постоењето“. Слично познатиот светски полски афористичар Станислав Јежи Лец рече: „Смеењето ја одразува трагедијата во ерата“.
Во рамки на пробиштипското културно 2021 лето, на 29.07.2021 во организација на продукцијата Златен Заб по сите можни протоколи на летната сцена во Пробиштип се случи стенд-ап комедија со еден од најдобрите македонски стенд-ап комичари Марјан Ѓорѓиевски кој е дипломиран актер, магистар по театарска режија, стенд-ап комичар, студент по Психологија и автор на книгата Јас и ти. Веднаш по премиерата на претставата Сомнително лице во Битолскиот театар, каде што тој ја одигра главната улога, овој комичар ги смееше до солзи присутните пред полниот амфитеатар во Пробиштип. Цел час пробиштипската публика се смееше на актуелни теми како: со која вакцина ќе се вакцинираат против глупоста, политиката, тик токот, учебниците, кинезите и лилјаци, Бил Гејц, 5џи, па се до теми како машки и женски глупости, инфлуенсерки, мрзата, завидлук, оговарање, вести на Тв, макфест во Штип… Публиката презадоволна посака уште вакви насмеани вечери.
Од таа причина не случајно во рамките на културното лето општината Пробиштип предвиде неколку стенд-ап настани, со желба да има се повеќе насмеани лица.
Следни кои ќе настапат на 13ти август во 21 часот на плоштдот во Пробиштип се комичарките од Србија: Ана Златановиќ и Јелена Мандариќ (познати како: Žene koje pričaju”). Ана има многу живописно семејство и подготвена е да зборува за нив. Завршила факултет за безбедност и мастер студии на истиот. Во животот била се – ја бранела Србија од тероризам како оператор на контрадиверзионата контрола на аеродромот Никола Тесла, ги слушала жалбите на корисниците во кол центарот, работела со туристи на море… Со стендап започнала во 2013 година.
Jелена се обидува да ги посочи сите комични елементи на штета на својот карактер, изглед, идиосинкратични одлики на целата своја личност. Треба да бидете многу силни за овој вид хумор бидејќи и Мандариќ е силна како карпа!
Ана и Јелена заедно со својот колега комичар, актер, радио и телевизиски водител и шоумен од Босна и Херцеговина Хазим Мујчиновиќ ќе ве насмеат до солзи. Хазим ќе се шегува на теми како: како е да се биде Босанец меѓу Босанците? Босанец во остатокот од светот? Како е да се биде актер меѓу другите занимања? Како се снимаат филмовите? До кога ќе се снима серијата “Луд, Збуњен, Нормалан“? Како е да се биде порно актер? Кога Босанците одат на море? Зошто Хрватска има најдобра репрезентација, а Босна и Херцеговина најдобри навивачи? 1000 зошто и 1000 зошто ќе дознаете во неговото комично шоу.
Смеата ослободува, опушта, ни помага да ја заборавиме маката, барем за момент.Општина Пробиштип подготви уште една вечер која ќе изобилува со хумор и смеа благодарејќи на најпознатиот комичар од екс Ју просторите-Драган Маца Маринковиќ. Овој актер, режисер, телевизиски водител и учесник во реалити шоуа ќе може да го видите на летната сцена во Пробиштип на 23.08.21. Стендап-комедијата „Мацаглу“- “Добре дојдовте на терапија” е создадена со спојување на познатите театарски претстави “Махалац” и “Џеврасим Цвијан“.
Маца ги комбинираше елементите на монодрама, мелодрама, кабаре и раскажување приказни од гореспоменатите претстави во стенд-ап комичнo шоу. Идејата за делото произлезе од чистата потреба на авторот и изведувачот да доделат автентичност на секоја изведба во личен стил, преку актуелни настани блиски до публиката. Шоуто е наменето за публика +18.
Не заборавајте хуморот е нашиот најважен лек.
Кога ќе зврши сето она што не загрижува и оптоварува кога ќе помине, ќе ги паметиме најуспешните шеги од времето на пандемијата, бидејќи мислам дека чешко-германскиот афористичар Габриел Лауб е во право, кој ни ја остави мислата: „Има толку добри политички, социолошки и психолошки книги што раскажуваат шестотини страници колку што е добра шега“.
