Изложба THE ART OF DISTANCE Уметноста на оддалеченоста Arti i largësisë на ДИТА СТАРОВА ЌЕРИМИ, на 16 ноември во Чифте амам
Може ли некој да биде далеку, а сепак да остане длабоко присутен во нашиот живот? Постојат врски што не ги определува физичката близина. Средби што продолжуваат да живеат во сеќавањето, чувства што ги надминуваат растојанијата и присуства што не исчезнуваат со оддалечувањето.
Токму во тој невидлив простор меѓу блискоста и оддалеченоста се развива новиот сликарски циклус „The Art of Distance“ на академската сликарка Дита Старова Ќерими, чија самостојна изложба ќе биде отворена на 16 ноември во Чифте амам, Национална галерија.
Преку 20 сликарски дела, авторката создава свет на интензивни бои, експресивни гестови, раскошни цветни форми и суптилни човечки силуети. Во овие композиции природата не е само мотив, ниту човечката фигура само претстава. Тие стануваат носители на сеќавањето, припадноста, кревкоста и потребата за поврзување.
Цветот, како симбол на животот и неговото постојано обновување, добива монументална сила, додека човечката фигура понекогаш едвај се насетува меѓу боите и светлината. Нивниот дијалог отвора простор за различни толкувања, за лични сеќавања и за чувства што не секогаш можат да се изразат со зборови.
Кураторот на изложбата, Горанчо Ѓорѓиевски, ги доживува делата како „интимно-имагинарен дневник“, нагласувајќи дека „Бојата е заробена енергија“. Во неговото толкување, сликите стануваат духовен простор во кој личното искуство, фантазијата и творечката енергија се преточуваат во визуелна поезија.
За својата уметничка определба, Старова Ќерими истакнува: „Верувам дека и во најтивките моменти на постоењето има простор за светлина, надеж и нови почетоци.“ „The Art of Distance“ не е само размислување за оддалеченоста, туку и за она што успева да ја надмине: човечката блискост, сеќавањето, љубовта и силата на животот што непрестајно се обновува.
Дита Старова Ќерими е академска сликарка, доктор на науки и универзитетска професорка на Факултетот за архитектура и дизајн при Универзитетот Американ колеџ Скопје. Со 25 години активно уметничко творештво, нејзините дела се претставувани на бројни самостојни и групни изложби во земјата и во странство, вклучително и во Париз, Њујорк и Цирих. Во периодот од 2015 до 2024 година ја извршуваше функцијата директорка на Националната галерија на Република Северна Македонија.
Куратор: Горанчо Ѓорѓиевски
