Книгата Во главата слушам песна (лирски рефрени) е збирка од 49 кратки текстови кои функционираат на повеќе нивоа. Од една страна, тие можат да се читаат како кратки, речиси микро раскази, со наративна структура, но и со силен лирски призвук. Лириката во нив е надополнета со музичката подлога врз која се градат (или на која асоцираат), преку музичката нумера, „лирскиот рефрен“ цитиран под секој од нив. Од друга страна, овие текстови се и интимни, речиси дневнички, автобиографски записи од животот на авторката, сеќавања од нејзиното детство, од нејзиниот живот и од животите на нејзините блиски (родителите, децата). Напишани се најчесто во прво лице, па од трета страна, делуваат и како интимен дневник на размисли, слики и звуци, надополнет со песнарка (доколку читателот реши не само да го чита, туку и да ги слуша цитираните нумери). И на крај, обраќањето во второ лице, до родителите, до децата, до љубовниците и пријателите, овозможува овие текстови да се читаат и како писма до блиските (и оние живите и оние мртвите), во кои авторката зборува за споделените импресии, заедничките искуства и емоциите. Напишана на прагот на педесеттата година на авторката, книгата е и една фрагментирана биографија, рекапитулација на некои настани, слики и звуци кои оставиле најдлабоки траги на нејзината личност.
Елизабета Баковска (1969) дипломирала и магистрирала на Филолошкиот факултет „Блаже Конески“ во Скопје, на Катедрата за англиски јазик и книжевност. Докторирала на тема од областа родови студии на Институтот Евро-Балкан. Преведува, пишува поезија, проза и книжевна теорија и критика.
На македонски јазик ги превела Надин Гордимер, Вилијам Фокнер, Бора Ќосиќ, Давид Албахари. Нејзина поезија, проза и критички текстови се преведени и објавени на англиски, шпански, романски, бугарски, словенечки, српски, црногорски јазик.
Објавени книги:
Житие на нашата љубов, поезија (Маседониа Прима, 2003)
Четири годишни времиња: раскази за суштински нешта, раскази (Блесок, 2004)
Состојби на духот и телото по триесеттата, поезија (Блесок, 2005)
На пат кон Дамаск, роман (Слово, 2006)
Варварите сè уште пишуваат поезија, поезија (самостојно издание, 2015)
Сопствена соба, сопствено гето: женското писмо во современата македонска проза, книжевна теорија/критика (самостојно издание, 2016)
Тринаесет осврти за книжевни и слични дела, книжевна критика (Блесок, 2018)
Последните голтки: раскази за суштински нешта, вторпат, раскази (самостојно издание, 2018).
