Граѓанската иницијатива „Охрид СОС“ и познатата алпинистка и активистка за заштита на природните богатства, Илина Арсова, предупредуваат дека во охридската населба Лагадин ќе се гради хотел во заштитениот зелен појас.
– И покрај приговорот што жителите на Лагадин го потпишаа со 99-процентно учество, противејќи се на урбанизацијата на крајбрежјето и на непланското менување на деталниот урбанистички план, односно, по ново, општиот акт за село Лагадин, и покрај сите препораки на УНЕСКО и на Министерството за животна средина, урбаната мафија во соработка со корумпираната Општина Охрид продолжува по свое. Ќе се гради хотел во инаку заштитениот зелен појас во населба т.е. село Лагадин – вели Арсова.
Екологистите се особено изненадени што градителите се поддржани и од холандскиот тур-оператор ТУИ, кој во светот пропагира заштита на природата.
– Никому ништо не му значи и масовно потпишаната петиција и реакциите на туристите, кои не сакаат медитерански плажи, туку ја претпочитаат недопрената природа во Охрид. Секторот на урбанизам при Општина Охрид уште еднаш ја покажа својата нетранспарентност и корумпирана активност во полза на нечии интереси, а на сметка на месното население, што е казниво со закон – појаснува Арсова.
