Доколку утре се одржат избори ВМРО-ДПМНЕ и СДСМ ќе бидат речиси изедначени, покажува најновата анкета на агенцијата „М-проспект“ направена по нарачка на телевизија „Телма“. За ВМРО-ДПМНЕ би гласале 23,3 отсто од граѓаните, за СДСМ 23 отсто.
Единствено промена би имало кај партиите на Албанците. Кога сега би се одржале избори Беса би била изедначена со ДУИ, односно би добила 3,5 отсто, а ДУИ 3,3 отсто. Алијансата за Албанците би добила 1,5 отсто, ДПА 2,2 отсто, а неопределени се високи 33,4 отсто.
Според анкетата, водечка партија кај албанските гласачи е СДСМ за кого се одлучиле 20,4 отсто од анкетираните. За ДУИ се изјасниле 14 отсто, за Беса 15, за ДПА 10 и за Алијанса на Албанците 6 проценти.
Македонците гласачи предност и даваат на ВМРО-ДПМНЕ, или 30,6 отсто, наспроти 23,8 за СДСМ. За разлика од Албанците, кај Македонците никој не би гласал за партија од албанскиот политички блок.
Истражувањето покажува дека најголем дел од граѓаните не гледаат излез од политичката криза со нови избори. Мнозинството, или 56,5 проценти се против нови предвремени избори, наспроти 38,6 проценти кои повторно би гласале.
Граѓаните најдоброто решение за формирање на следна влада, откако Груевски го врати мандатот, гледаат во широка коалиција во која би влегле сите поголеми партии. За широка коалиција се определите 30,2 отсто од испитаниците. Три проценти помалку, или 27,3 отсто сметаат дека следната влада треба да ја формира СДСМ, додека помалку или 23,5 отсто сакаат влада предводена од ВМРО-ДПМНЕ.
По етничка припадност, и Македонците и Албанците, одговориле со идентичен процент, 30 отсто, дека најдобро решение за формирање на влада е широка коалиција. Разликата во двата етнички блока се јавува по прашањето на формирање на политичка влада од двете македонски партии. 28 проценти од Македонците би сакале неа да ја формира ВМРО-ДПМНЕ, додека 23 отсто СДСМ. Албанците пак 44 проценти посакуваат влада на СДСМ, наспроти само 7 проценти кои повторно сакаат влада на ВМРО-ДПМНЕ.
На прашањето дали е потребно да се продолжи периодот во кој СЈО може да покренува обвиненија 62,8 проценти од граѓаните одговориле потврдно, против биле 28,8 проценти, а само 8 отсто немаат одговор на ова прашање
Анкетата е спроведена телефонски во периодот од 4 до 10 февруари на репрезентативен примерок од 1.000 испитаници.
