СДСМ уште еднаш ги излажа граѓаните и наместо да работи за да го подобри стандардот повторно им удри по џебот. Наместо намалување на давачките и враќање пари од данокот на додадена вредност како што ветуваа, тие сега на граѓаните им воведуваат дополнителни давачки, изјави денеска на прес-конференција Слободанка Алексовска од ВМРО-ДПМНЕ.
-СДСМ почнува да ги оданочува сите физички лица кои имаат годишни приходи од 1 милион денари. Секој оној кој заработува годишно над 16.000 евра, СДСМ одлучува да го казни и да го задолжи да се регистрира и како ДДВ обврзник. На тој начин за секој остварен приход каде е исклучен персоналниот данок на доход ќе се плаќа и ДДВ. На овој начин физичките лица се ставаат во нерамномерна положба во однос на компаниите, бидејќи ќе бидат двојно оданочени, и со персонален данок на доход и со ДДВ. Значи секој оној кој што заработува екстра околу 80.000 денари месечно, со двојното оданочување од персонален данок и ДДВ, на крајот на годината ќе биде оданочен со над 250.000 денари на вкупната сума од 12 месеци – вели Алексовска.
Од ВМРО-ДПМНЕ додаваат дека ваквиот начин на водење економска политика која е на штета на народот, само дополнително ќе ги дестимулира квалитетните кадри да продолжат својата егзистенција да ја гледаат во Македонија, а државата ќе почне уште повеќе да тоне во бесперспективност.
