Вториот уписен рок на Универзитетот „Свети Кирил и Методиј“ е денеска и утре, каде се останати уште 5.700 слободни места, на вкупно 21 факултет при УКИМ.
Најголем интерес идните студенти покажале за Факултетот за информатички науки и компјутерско инженерство, каде уште во првиот уписен рок се пополнети сите 1080 слободни места. Голем интерес матурантите покажале и за Медицинскиот факултет, каде се останати само 48 слободни места, за Факултетот за дизајн и технологии на мебел и ентериер, како и за Економскиот факултет каде се исполнети повеќе од две третини од слободните места.
Најмногу слободни места се останати на Природно – математичкиот факултет (964), по што следуваат Филолошкиот факултет (798), Правниот факултет (728), Филозофскиот факултет (461), Факултетот за електротехника и информациски технологии (444) и Факултетот за земјоделски науки и храна (426).
Најслаб интерес во првиот уписен рок имало на Шумарскиот факултет, каде се пополнети само 9 од вкупно 120-те понудени места, како и на Факултетот за земјоделски науки и храна, каде се запишале 64 студенти на вкупно понудените 490 слободни места.
Релативно слаб интерес е покажан и за Правниот факултет „Јустинијан Први“, каде од првично предвидените 1055 слободни места останати се дури 728. Идните студенти слабо се пријавувале на факултетите по новинарство и политички студии, каде се запишале 32 бруцоши (12 на новинарство и 20 на политички студии) од понудените вкупно 210 места на овие два факултети.
Конкурсот за вториот уписен рок на УКИМ, може да го најдете на следниов ЛИНК.
