Претседателот на државата Стево Пендаровски со указ го назначи професорот Љубомир Фрчкоски за ополномоштен амбасадор на Република Северна Македонија при Организацијата на Обединетите нации во Њујорк.
Остра реакција следуваше од пратеникот Антонио Милошоски од пратеничката група на ВМРО-ДПМНЕ и коалицијата „За обнова на Македонија“, по однос на незаконитото испраќање на Фрчкоски за амбасадор во Обединетите нации.
“Претседателот Пендаровски не ја говори вистината кога кажа дека сите законски услови се исполнети, напротив, законскиот услов од член 39 од Законот за надворешни работи за претставување пред собраниската комисија, не е исполнет и со тоа Собранието, а преку Собранието и јавноста, немале можност да извршат контрола врз извршната власт, како што е и Претседателот и самите амбасадори.
Но, имам една порака, ако Претседателот Пендаровски денес одлучил заради било кои причини незаконито да го упати Фрчкоски за амбасадор во Обединетите нации, побрзо отколку што мислат ќе дојде денот кога Фрчкоски на законски начин ќе биде вратен во земјата, изјави Милошоски.
И втората работа, досега е невиден преседан и прв пат во македонската дипломатска историја за амбасадор во Обединетите нации да се испраќа личност која што била одбиена од официјален Вашингтон како непожелен дипломат да биде амбасадор во Америка.
Затоа сметаме дека ваквиот амбасадор во Обединетите нации е нарушување на угледот на македонската дипломатија, а до одредена мерка и потценување на ставот на официјален Вашингтон кој што веќе го одбил Фрчкоски”, додаде Милошоски.
