Почнувајќи од декември 2019 до февруари 2020 година, Агенцијта за промоција и поддршка на туризмот го реализира вториот дел од медиумската кампања со која го промовира туристичкиот потенцијал на земјава и содржините што туристите можат да ги искусат во текот на зимата. Промовирањето на природните убавини, традиција, култура и гастрономија ќе се одвива целосно на интернет (100% online), на најпознатите и најпосетени интернет страни на медиуми низ Балканот. Во концептот за рекламирање на АППТ – 100% online, покрај рекламирање на интернет страните на познати медиуми, бројни активности ќе има и на социјалните медиуми кои во моменов се најсилните канали на комуникација преку кои се допира до потенцијалниот турист. Изборот за промоција на дестинацијава преку интернет во фокус ги стави помладите генерации и нивно анимирање преку најактивно користените канали на комуникација (фејсбук, инстаграм, твитер, пинтрест). На овие канали строго ќе се таргетираат оние кои најмасовно ги користат – Millennials и Z генерациите преку хаштагот – ТвојатаСледнаДестинација (#YourNextDestination).
Медиумската кампања на АППТ ќе биде лансирана во 9 балкански држави (Албанија, Косово, Србија, Бугарија, Словенија, Хрватска, Турција, Романија и Полска) и на 20 различни интернет медиуми.
Реализацијата на медиумската кампања со која се промовира туристичкиот потенцијал има за цел да ја разбуди и поткрене свесноста на младите, слободни патувачи, за постоењето на РС Македонија како туристичка дестинација. Идеата на АППТ е преку модерни маркетинг алатки и на креативен начин да се претстави богатата македонска гастрономија, традицијата, културното наследство и манифестации, но овој пат и интензивна комуникација на Скопје и Охрид како дестинации до кои има директни летови, што треба да ги стави повисоко на листата на туристите за нивно неколкудневно “викенд бегство”.
Во дел од медиумите ќе се рекламираат Маврово, Пелистер, Берово, Пехчево, Кратово и целата Малешевија како најсоодветни дестинации за задоволување на потребата од авантура и спортски активности кои во последните години се неизоставен дел од патувањето на младите, индивидуални туристи, кои имаат нескротливиот дух и енергија.
