Делегацијата од Министерството за внатрешни работи на РС Македонија предводена од директорот на Бирото за јавна безбедност, д-р Сашо Тасевски, на 26 и 27 септември, во седиштето на Европол во Хаг, Холандија учествуваше на Европската конвенција за шефови на полиции 2023 година, осмислена како панел дискусии на актуелни теми кои што претставуваат предизвик земјите од Европа. Организираниот криминал како фактор за дестабилизација на нашето општество, динамичното темпо на евалуација на сајбер криминалот, како и предизвиците од нелегалната миграција беа главни теми за дискусии за време на дводневната конвенција.
Во рамки на Европската конвенција, директорот Тасевски оствари и билатерална средба со извршниот директор на Европол, Катрин Де Бол, на која се дискутираше за моменталната успешна стратешка и оперативна соработка помеѓу Република Северна Македонија и Европол. Де Бол го истакна успехот во борбата против криумчарењето на мигранти со оглед на намалениот проток на илегални мигранти низ територијата на РСМ. Директорот Тасевски ги објасни начините на кои македонската полиција се справува со криумчарењето на мигранти и упати благодарност до Европол во однос на оперативната поддршка што ја добиваме во борбата против недозволената трговија со дрога и борбата против тероризмот. Де Бол и Тасевски потенцираа дека и во иднина ќе работат на јакнење на оперативната и стратешка соработка.
Директорот Тасевски оствари билатерални средби и со директорите на полициите на Република Словенија, Република Хрватска и Република Србија. На средбите се стави акцент на најновите миграциски текови, територијалната застапеност на Фронтекс, заедничкиот пристап кон спречување на криумчарењето на мигранти, како и заложбите на регионот да се стават под контрола организираните криминални групи, кои претставуваат закана за безбедноста на земјите од Западен Балкан. Заедничка констатација беше дека соработката е на завидно ниво.
