Турската војска објавила соопштение во кое било наведено дека ја презела контролата над Турција, пренесуваат странските медиуми.
„Дел од војската изврши државен удар“, изјави премиерот на Турција, Бинали Јилдрим откако е објавено дека воени хеликоптери ниско ги надлетувале Анкара и Истанбул.
Одредени медиуми јавуваат дека воен хеликоптер пукал врз седиштето на Турската национална известувачка служба.
Британски „Гардијан“ пишува дека Обединетите Нации ги известиле вработените дека е во тек воен удар во Турција.
Граѓаните изјавиле дека забележале зголемено присуство на војската низ улиците, но не биле познати причините за тоа.
Турските медиуми пишуваат дека мостот на Босфорот во Истанбул како и мостот Фатих Султан Мехмет се затворени, а дека истрели од огнено оружје се слушаат во Анкара.
Исто така социјалните мрежи во Турција се блокирани, а националната телевизја ТРТ е исклучена, јавуваат медиумите.
Ројтерс јави дека турскиот претседател Реџеп Таип Ердоган е на одмор и надвор од земјата.
