Снежната бура „Егон“ предизвика смрт на едно лице, илјадници луѓе останаа без струја, а од германските аеродроми се откажани стотици летови.
Бурата, која се движи од запад коn источниот дел на Германија и до крајот на денов треба да замине во Полска, предизвика прекин на неколку патни правци поради силниот ветер кој корне дрвја во повеќе региони на земјата, јавува дописникот на МИА од Берлин.
Само од аеродромите во Франкфурт , Лајпциг и Дрезден откажани се 250 лета а на многу други аеродроми доцнењата се по неколку часа.
Во регионот Горна Франконија во покраината Баварија околу 6.600 дома’инства со часови се без електрична енергија.
Бурата „Егон“ предизвика блокада на скијачи во баварските Алпи каде што ветерот ги искинал електричните кабли и ски-лифтовите.
Германската метеоролошка служба денеска ги предупредува граѓаните дека снежната наметка може да достигне висина од 30 сантиметри за неколку часа, поради што треба да се откажат сите патувања кои што не се неопходни.
