Студентите членови на камерниот оркестар „Солисти на ФМУ“ под раководство на проф. м-р Сашо Татарчевски освоија златна диплома со 98 поени во натпреварувачката категорија, како и награда Гран при на фестивалот „Братислава спринг фестивал“, кој традиционално се одржува во последната третина од месецот март во Братислава, главниот град на Словачка. Ова е прво меѓународно натпреварување на овој оркестар во историјата на Факултетот за музичка уметност од Скопје при Универзитетот „Св. Кирил и Методиј“.
Овој успех, како што се наведува во соопштението на Факултетот, е постигнат благодарение на поддршката од Министерството за култура и туризам, како и од Универзитетот „Св. Кирил и Методиј“, и е јасен показател за тоа колку е важно да се поддржат оние индивидуи и колективи што на таквата поддршка постојано возвраќаат со врвни достигнувања.
