Министерот за здравство д-р Венко Филипче и н.е.Сергеј Баздникин амбасадор на Руската Федерација во РСМ, денеска на меѓународниот аеродром во Скопје ја пречекаа првата пратка од вакцината против Ковид 19, на рускиот производител „Спутник В“. Министерот Филипче изрази благодарност до амбасадорот за неговиот личен ангажман за овие дози, што побрзо да стигнат во нашата земја. Од рускиот производител, нашата земја обезбеди 200.000 вакцини, денешната испорака е 3000 дози за исто толку граѓани, а за ревакцинација ќе стигне нова пратка.
– Ние ќе ја продолжиме нашата интензивна комуникација со цел да се организира и динамиката на доаѓањето на следните количини. Вкупно нарачани се 200.000 дози, станува збор за вакцини коишто се различни во делот на вакцинација и ревакцинација, што значи дека сите овие 3.000 дози ќе се користат за прва вакцина. Продолжува процесот на имунизација во дел на здравствени работници и според индикацијата на граѓани како што е тоа предвидено во Националниот план за имунизација – изјави Филипче.
Амбасадорот Баздникин рече дека вакцината „Спутник В“ е безбедна и ефикасна и истакна дека вакцината ќе биде вредно оружје во борба против ковид пандемијата.
-Со Република Северна Македонија, вакцината е регистрирана во 46 земји во светот, вклучувајќи неколку држави во ЕУ. Сега е во тек во забрзана постапка во Европска Агенција за Лекови за да ја испитува делотворноста на вакцината врз основа на резултати од досегашите лабораториски испитувања и истражувања. Во СЗО се разгледува барањето за „Спутник В“ да се вклучи во листата на лекови одобрени од СЗО да се користи во вонредни ситуации –
Имунизацијата ќе продоложи да се одвива согласно Националната стратегија за имунизација објасни министерот Филипче. Вакцината од производителот „Спутник В“ се чува на -20 степени, а истата е сместена во Поликлиниката Јане Сандански во Скопје.
-Станува збор за замрзнат раствор, тоа значи дека за разлика од фајзеровата вакцина којашто се раствараше и од една вијала се вадеа шест дози ова е една вијала за од 0.5мл за еден корисник на вакцината. Во однос на вакцинацијата има упатство за претпазливост само кај трудници и доилки и никаква друга контраиндикација, значи продолжуваме со Националниот план кадешто најстарите граѓани со хронични болести и тоа што денеска и вчера работеа претставниците на нашиот тим којшто го изготвуваше планот, веројатно дека ќе бидат луѓето сместени во старечките домови. Сите тие со хронични заболувања ќе бидат известени преку своите матични лекари да дојдат до пунктовите коишто ќе бидат најблиску до местото на живеење, а во делот на старечките домови ќе се спроведе таму во домовите кајшто се старите лица сместени – изјави министерот.
