Турската нискобуџетна авиокомпанија „Онур Ер“ за претстојната туристичка сезона ќе воспостави директна авионска линија од Истанбул за Охрид.
Летовите од Истанбул за Охрид ќе бидат еднаш неделно, почнувајќи од 15 април, заклучно со 7 октомври. Првично билетите за летот ќе се продаваат преку турскиот тур-оператор „Татил Будур“, но ќе бидат понудени и на отворена продажба доколку постои интерес на пазарот.
Воспоставувњето сезонска авионска линија е резултат на преговорите што авиокомоанијата ги имаше со македонската Влада, како обид за привлекување што поголем број гости на охридската ривиера.
– Наша интенција е да работиме во насока на развој на авионскиот сообраќај и оттаму ќе ја поддржиме секоја авиокомпанија која сака да воспостави директна авионска линија за Македонија. Аеродромот во Охрид има голем потенцијал и нашите активности се насочени кон привлекување што поголем број патници кон Охрид, особено кога станува збор за нискобуџетни авионски компании – вели министерот за транспорт и врски Горан Сугарески.
Авиокомпанијата „Онур Ер“ оперира со 24 авиони што летаат на речиси 40 дестинации, како низ Турција така и на меѓународни летови. Во Европа „Онур Ер“ моментално има директни авионски линии за Русија, Франција, Германија, Австрија, Холандија и Украина.
