Глобалната и европската безбедносна состојба, активностите за зацврстување на сигурноста на НАТО,потребата од гарантирање на стабилноста на регионот, како и начините за унапредување на одбранбената соработка помеѓу Северна Македонија и Романија беа темите на кои денеска во Букурешт разговараа министерката за одбрана Славјанка Петровска и нејзиниот романски колега, министерот за национална одбрана Ангел Тилвар.
„Според нас и Северна Македонија и Романија водат прагматична надворешна и безбедносна политика чија основна цел e крај на воените дејствија и повторно враќање на мирот и сигурноста во Европа и во светот. Нашите две земји ја разбираат потребата од одговорно однесување кое наместо поделби и страдања, повикува на интеграција и заедништво“, рече министерката на состанокот. Петровска додаде дека македонските војници упатени во Мултинационалните сили на НАТО во Романија ќе продолжат да даваат свој личен придонес кон зацврстувањето на безбедноста на источното крило на Алијансата, вклучувајќи ја и Романија.
Пристапот 360 степени, истакна министерката, не е само декларативна заложба, туку секоја земја членка треба придонесе кон тоа. Задача на нашата држава е да го гарантираме нашиот одбранбен систем, но и да учествуваме во градењето на одбранбениот систем на Алијансата.
Министерката Петровска се заблагодари за силната романска поддршка за евроинтеграциите на Северна Македонија и порача дека интегративните процеси за целиот регион се безбедносно прашање кое мора да биде приоритет за секој политичар и секоја Влада во земјите во регионот. Поделбите нема никому да му донесат добро, рече министерката, и додаде дека историјата на Европската Унија ни покажува дека помирувањето и заедништвото се единствениот пат кон подобра иднина за следните генерации.
Во контекст на регионот, министерката ја реафирмираше поддршката за иницијативите во кои и Северна Македонија и Романија се составен дел, како процесот СЕДМ кон кој се очекува да се приклучи и Молдавија. Дел од процесот СЕДМ е и Бригадата на Југоисточна Европа, каде во командата лоцирана во Куманово свој придонес даваат и романски офицери.
Северна Македонија и Романија во областа на одбраната соработуваат од 1998 година. Во однос на развојот на билатералната соработка, министрите Петровска и Тилвар истакнаа дека истата е на високо ниво и изразија интерес и подготвеност за нејзин посилен развој во иднина. Одбранбената соработка се реализира преку годишни планови со висок степен на реализација. Во 2023 година предвидени се 17 заеднички активности, од кои 7 во Северна Македонија.
Посетата на министерката Петровска денеска продолжува со обиколка на касарната Отопени и средба со македонскиот контингент во рамките на Мултинационалните сили на НАТО сместени во оваа касарна.
