Со над 30 промотивни настани, од утре, 18 април, до 24 април во арената „Борис Трајковски“ во Скопје ќе се одржи 36. издание на Саемот на книгата.
Слоганот е „Приказна се чита“, чија цел е да го доближи Саемот до помладата популација, а покрај едукативно-културниот аспект, годинава се воведува и општествено одговорна компонента.
Даниела Глигоровска, управителка на „Скопски саем“, на брифинг со новинарите најави дека Саемот ќе биде отворен за посетители во 10 часот, а во 13 часот ќе биде официјалното отворање, при што обраќање ќе има министерката за култура, со оглед на тоа што Министерството за култура е покровител, а Саемот на книгата е прогласен за проект од национален интерес во културата.
Работното време на Саемот на книгата ќе биде од 10 до 20 часот.
