Раководното лице во Министерството за култура и уште еден осомничен во случајот „Тендери“ досега не се појавија на распит во Кривичниот суд иако Специјалното јавно обвинителство уште во четвртокот минатата недела, побара од судот да им ги одземе пасошите и да им наложи еднаш неделно да се јавуваат кај службено лице.
Неизвесно останува дали двајцата осомничени и денеска ќе дојдат на распит во судот. Од Кривичниот суд засега не можат да кажат дали судијата на претходна постапка им ги доставил на осомничените поканите за распит.
Инаку, според членот 294 од Законот за кривична постапка, по донесувањето наредба за спроведување истражна постапка, судијата на претходна постапка е должен без одложување да го разгледа предлогот за мерки за обезбедување присуство и веднаш да одлучи по него.
„По донесувањето наредба за спроведување истражна постапка до судијата на претходна постапка, јавниот обвинител може да достави образложен предлог за определување мерка притвор или други мерки за обезбедување присуство на обвинетиот. Судијата на претходна постапка е должен без одложување да го разгледа ваквиот предлог и веднаш да одлучи по него. Ако судијата на претходна постапка не се сложи со предлогот на јавниот обвинител, за тоа ќе донесе посебно образложено решение. Против ова решение јавниот обвинител има право на жалба во рок од 24 часа до советот, според членот 25, став 5 на овој закон“, стои во ставот 1 на член 294 од Законот за кривична постапка.
Кривичниот суд во петокот соопшти дека го добил барањето на СЈО и дека судијата на претходна постапка „треба да ги повика лицата за кои се однесува предлогот за да се произнесат во врска со него“.
