Собранието попладнево ги верификуваше мандатите на сите 120 пратеници. По предлог на Верификационата комисија, „за“ гласаа 114 пратеници, а ниту еден против или воздржан.
– Врз основа на извештајот на Државната изборна комисија (ДИК) за изборите одржани на 11 декември, комисијата констатира дека нема основа за оспорување на верификацијата на мандатите на 120 пратеници. Верификационата комисија му предалага на Собранието да ги верифицира мандатите на пратениците во Собранието на РМ – рече Владимир Ѓорчев.
Пред гласањето, пратеникот Ибрахим Зекирија од Беса го повика Собранието да не го верификува мандадот на Јохан Трчуловски од ВМРО-ДПМНЕ, поради тоа што беше осуден од Хашкиот трибунал за злосторства врз албанско население во 2001 година. Зекирија не го посочи со име Трчуловски, но јасно алудираше на кого мисли.
– Јас сум загрижен што денеска во Собранието станува пратеник некој што од Хашкиот суд беше осуден за злосторства кон албанските цивили во 2001 година. Тие беа мои соселани во Љуботен. Го повикувам Собранието да не го верификува мандатот на овој пратеник – рече Зекирија.
На ова реагираа претседателот на Собранието во заминување, Трајко Вељаноски, кој претседаваше со конститутивната седница, и Илија Димовски, двајцата пратеници на ВМРО-ДПМНЕ. Вељаноски рече дека треба да има деловнички или законски причини за некому од пратениците да не му биде верификуван мандатот, а не врз основа на тоа дали некој некому се допаѓа или не.
– Изборната кампања, кога можеа да се даваат разни квалификации, заврши. Собранието и пратениците треба да работат конструктивно. Ако правиме список кој кому не му се доаѓа, тој би бил многу долг – рече пратеникот Димовски.
Иако беше најавена како точка на дневниот ред, Собранието на денешната седница не го избра новиот претседател и потпретседателите на законодавниот дом бидејќи, како што рече Вељаноски, сè уште нема предлог од десетмина пратеници за нов спикер и за негови заменици.
Вељаноски ја прекина денешната седница, а следната, кога треба да биде избран новниот претседател на Собранието, ќе биде закажана дополнително, кога ќе се создадат деловнички услови за тоа.
