Предвремените парламентарни избори што беа закажани на 12 април и дефинитивно се одложени на неопределено време. Македонската влада на вчерашната седница донела уредба со законска сила за прекин на сите дејствија за спроведување на изборите и за сите прашања поврзани со изборниот процес.
„Оваа одлука Владата ја донесе заради вонредната состојба прогласена за ефикасно спречување на внесување и ширење на корона вирус COVID-19, и заради тоа што Собранието не се состанува за да ја поништи одлуката за распуштање“, се наведува во соопштението на владината прес – служба.
Со донесената уредба Владата ја задолжува Државната изборна комисија да ја обезбеди и чува постојната изборна документација до продолжување на спроведувањето на изборните дејствија и изборите, кои ќе продолжат откако ќе биде прогласен престанок на вонредната состојба.
Уредбата исто така, определува задолжување за Државната изборна комисија во рок од еден ден од денот на престанок на вонредната состојба да објави на својата веб страница ревидиран роковник за продолжување на изборните дејствија, соопштуваат од владата.
