На конкурсот за традиционалните награди на Друштвото на писателите на Македонија за најуспешни остварувања во 2017 година, досега пристигнале 70 дела од 65 автори.
ДПМ очекува бројот на книгите да биде поголем со оглед на тоа дека конкурсот е отворен до крајот на декември.
Пристигнатите дела конкурираат за наградите „Ацо Шопов“ за поезија, „Стале Попов“ за проза, „Димитар Митрев“ за критика и есеистика, „Ванчо Николески“ за книга за деца и „Книжевен мост“ за најдобра книга напишана на еден од јазиците на националностите.
Признанијата на ДПМ ќе бидат врачени на 13 февруари идната година, на свеченост по повод 71-годишнината од основањето на македонската писателска асоцијација.
Одлуките за најуспешните остварувања ќе ги донесат жири-комисии составени од 15 истакнати писатели, универзитески професори, критичари и есеисти.
