Вечерва во Центарот за култура „Антон Панов“ во Струмица ќе почне 13. издание на Меѓународниот филмски фестивал „Астерфест“, кој годинава се одржува под мотото „Меѓу фактот и фикцијата“.
Во текот на петте фестивалски денови кои ќе завршат на 30. јуни, публиката ќе има можност да погледне 40 ексклузивни кусометражни играни и документарни филмови во официјалната програма, Анимоушн, Глобална фикција и Ѕвездени документи, како и во ревијалните програми Мувиленд, Мери-Дионс, Посвети и Оберхаузен на турнеја.
Од организацијата на фестивалот информираа дека денеска следат проекции на филмовите: „Јас сум Сами“, повеќекратно наградуван филм на Кае Бахар, номинираниот за Оскар „Виолината на Џо“ на Кахане Куперман, оскаровецот „Пеј“, филмско остварување на Кристоф Деак, како и филмот на Ендрју Коутс и Лу Хаму-Лхаџ, „Позајмено време“, со номинација за Оскар.
Првата фестивалска вечер продолжува со блокот од шест анимирани филмови и исто толку танц-филмови . Тука се анимираните филмови од програмата Анимоушн: „Авионот“ на Хесус Мартинез, „Јажиња“ на Педро Солис Гарсија, „(Ин)феликс“ на Марија ди Раза, „Шетачот“ на Тибалт Шолет, „Гиро-танц“ на Пјотр Лоц Хоанг Нгоц, како и „Акт“ на Ацо Станкоски.
Истата вечер на програмата се и филмовите во програмата Мувиленд, и тоа: „Скроено“ на Аугенблик, „Нарушувања“ на Фелипе Фроза и Улрике Флеминг, „Како си денес“, филм на Чиу Чих Хуа, „Детски птици за камера“, филмски проект на Давид Дауриер и Ерик Минх Куонг Кастаинг, „Легни ме долу“ на Марлене Mилар, како и филмот на Фук Пак Џим, „Да речеме“.
Фестивалот продолжува утре претпладне во манастирот „Воведение на Пресвета Богородица“ во Вељуса, каде со почеток во 11:30 часот ќе бидат одржани портрети и беседи за лауреатите.
За наградите ќе одлучува меѓународно жири во кое членуваат филмските автори: Наталја Алтхаузер од Германија, Елена Мелончели од Италија и Срѓан Финк од Холандија.
