Песната “Ѓавол да те земе” во изведба на Драган Спасов Дац и Александар Митевски е прекрасна љубовна нумера, која за прв пат кај нас се изведува на знаковен јазик, во којa учествуваат млади девојки кои пленат со енергија. Секоја на свој уникатен начин допринесува магичен спој на музиката и зборовите допрени до секого.
Интервју со Соња Кимова Делевска, сертифициран толкувач на знаковен јазик и предавач
ДЕНЕС МАГАЗИН: Како започна соработката помеѓу изведувачите и девојките?
Соња Кимова Делевска: Националниот Сојуз на глуви и наглуви на РС Македонија со поддршка на Министерството за труд и социјална политика веќе 15-тина години спроведува обуки на знаковен јазик за професионални толкувачи и граѓани кои сакаат да го научат знаковниот јазик. Јас сум дел од предавачите за изучување на знаковниот јазик и на почетокот на годината започнавме со нов циклус на обуки, но за време на карантинските денови обуките беа прекинати. Во моментот кога Драган Спасов Дац и Александар Митевски ја промовираа песната Корона Чао, дојдов до идеја да им ја дадам како предизвик на “учениците” од четврто ниво да ја истолкуваат на знаковен јазик. Инаку како дел од моите обуки секогаш на крајот од секое ниво обработуваме некоја песна, со што сакам да им доловам како на посетителите на обуките така и на пошироката јавност, дека секој има право до пристап на информации од секаков вид и дека сѐ може да се преведе на знаковен јазик. Колегата Огнен Јанески од Телевизија 24 ја пушти во етер и така Дац и Александар дознаа за нас.
ДЕНЕС МАГАЗИН: Дали за овој проект претходно имаше договор или спонтано дојде до реализација? Кои се девојките што ги пренесуваат на многу симпатичен начин зборовите упатени до лицата со оштетен слух?
Соња Кимова Делевска: Соработката со Драган Спасов Дац и Александар Митевски за песната “Ѓавол да те земе” се случи спонтано преку колешката Даниела Дичоска. Покрај краткиот временски период од два дена, се реализираше соработката, а резултатот го видовме сите. Краткиот временски период беше предизвик за девојките Анела Смилевска, Весна Нолевска, Марија Дичоска, Верче Стевковска и Александра Аврамовска кои се дел од групата посетители во четврто ниво. Голема благодарност до Драган Спасов Дац и Александар Митевски кои успеаа да ја подготват песната и кои што имаа слух за глувите лица. А, и ова не е првпат да допрат до глувата популација. Нивниот настап на минатогодишниот Макфест беше во придружба на колешката Викторија Волак, која ја пренесе песната до глувите лица
ДЕНЕС МАГАЗИН: Првиот коментар што е напишан по изведбата беше дека ние досега не сме биле свесни дека постојат луѓе кои што не можат да ги разберат нашите убави песни. Сите не затекна оваа констатација, на која ретко кој застанал и се подзамислил како е во светот на тишината без нотите на музиката.
Соња Кимова Делевска: Повеќето од посетителите на знаковен јазик за првпат се среќаваат со знаковниот јазик и за првпат имале контак со глуви лица. Многу сум им благодарам на сите прекрасни луѓе кои ги поминаа обуките и на тие кои сега ги следите на нивната љубов и истрајност да го научат знаковниот јазик и да го афирмираат, што се доблесни да научат да ги слушнат тие што не зборуваат и да зборуваат со тие што не слушаат.
ДЕНЕС МАГАЗИН: Поддршка за целата екипа, но дали наскоро ќе има и други вакви проекти?
Соња Кимова Делевска: Минатата година заедно со едицијата Светулка и илустраторот Иванка НиБа реализиравме четири сликовници на знаковен јазик наменети за деца од предшколска возраст. Идејата беше сликовниците да ги толкуваат деца кои го познаваат знаковниот јазик, но поради краткиот временски период до промоција на истите, ги истолкував јас. Објавени се уште пет сликовници и до крајот на годината ќе треба да се објават уште две. Мојата идејата е да обучам деца кои ќе ги истолкуваат новите изданија на сликовниците “ОД ДЕЦА ЗА ДЕЦАТА СО ОШТЕТЕН СЛУХ”.
Во чест на Светскиот ден на детето 20-ти ноември сакамe да дадеме свој белег со учествтво на група дечиња кои знаковно ќе толкуваат една детска песна.
Како и секаде така и кај нас финансискиот проблем е присутен. Со надеж дека ќе го надминеме и ќе успееме да ги промовираме и другите сликовници.
ДЕНЕС МАГАЗИН: Кога за прв пат се сретнавте со предизвикот да им излезете во пресрет на лицата со оштетен слух?
Соња Кимова Делевска: Јас сум магистер по економски науки-претприемништво и во мојата магистерска работа го обработив претприемништвото кај лицата со оштетен слух и говор. Во периодот 2015 година кога магистрирав во нашата држава имаше само седум претприемачи со оштетен слух. Секоја година од тогаш бројот се зголемува, но проблемите со кои се соочуваа тогаш и денес се истите. Јазичната бариера е најголемата пречка во достигнување на нивните цели. Со оглед на тоа дека потекнувам од семејство во кое моите родители се глуви добро ја познавам природата на тие лица. Знам колку се способни и колку можат да постигнат доколку им се даде можност. Оттаму идејата за која се надевам дека Владата на РСМ ќе даде поддршка за отварање на инклузивен бизнис инкубатор кој ќе ги поддржува бизнисите на сите претприемачи, посебно на претприемачи лица со посебни потреби.
Интервју denesmagazin.mk
Подготвил: Соња Ајановска Деловска
